Føroysk flogbóltsfeløg spæla evropeiskt

Kvinnurnar hjá SÍ og menninir hjá Mjølni fara næsta kappingarár at royna seg í evropeiskum kappingum fyri feløg

SÍ vann greipuna í fjør. Næsta ár skulu tær royna seg í Evropa fyri fyrstu ferð

08.06.2023 - 09:58

SÍ og Mjølnir skriva nú føroyska flogbóltssøgu.

Kvinnurnar hjá SÍ, sum vunnu bæði FM og steypakappingina í fjør, og Mjølnir, sum gjørdi tað sama hjá monnunum, hava melda seg til evropeisku kappingina, Challenge Cup, skrivar Flogbóltssambandið.

Hetta er fyrstu ferð, at føroysk flogbóltsfeløg skulu spæla í evropeiskari kapping hjá evropeisku flogbóltssamgonguni, CEV.

Triðsterkasta evropeiska kappingin

Challenge Cup er triðsterkasta kappingin fyri feløg, sum CEV skipar fyri. Sterkasta kappingin er Champions League, har bestu meistaraliðini spæla, meðannæstbesta kappingin eitur CEV Cup.

Nú hava SÍ og Mjølnir gjørt av at kappast í Challenge Cup næsta ár.

Lutakast um, hvørjum hvørja mótstøðu føroysku liðini fáa, verður 19. juli, og heima- og útidystir verða mest sannlíkt í oktober og november 2023.

Mjølnir ætlar at fáa badmintonhøllina í Klaksvík góðkenda til sín heimadyst, skrivar Flogbóltssambandið, sum sigur, at luttøkan hjá SÍ og Mjølni hevur sera stóran týdning fyri føroyskan flogbólt.