Russland hartar Ísland, tí tað stongir sendistovuna í Moskva

Russiska stjórnin hevur svarað Íslandi aftur, nú Ísland í gjár boðaði frá, at sendistovan í Moskva stongir 1. august.

- Anti-russisku handlingarnar frá teimum ráðandi í Reykjavík fáa heilt vist aftursvar, sigur russiska uttanríkisráðið.

Russiska stjórnin hevur boðað frá tiltøkum eftir íslendsku avgerðina um at stongja sendistovuna í Moskva, har ísland eisini krevur, at russiski sendiharrin í Íslandi skal fara av landinum. Tað skrivar AFP-tíðindastovan.

Óvinarlig avgerð

Í fráboðanini frá Russlandi verður íslendska avgerðin lýst sum 'óvinarlig', og at hon forkemur samstarvinum millum londini.

Russland minnir á, at tað var fyrsta landið, sum viðurkendi Ísland sum sjálvstøðuga tjóð, og at Russland hjálpti Íslandi at verja íslendsk áhugamál í truplum tíðum. 

- Avgerðin hjá Íslandi verður havd í huga í komandi samskifti millum londini, sigur russiska uttanríkisráðið í fráboðanini.

Vistu av ongum

Tað var íslendski uttanríkisráðharrin Þórdís Kolbrún Reykfjörð Gylfadóttir, sum í gjár boðaði frá avgerðini, og segði samstundis, at stjórnin væntar við hesum lítið virksemi á russisku sendistovuni í Íslandi, og tí verður mælt til, at russiski sendiharrin Mikhail Noskov, fer heimaftur til Russlands.

Ivan Glinkin, talsmaður fyri russisku sendistovuna í Íslandi, sigur við íslenska kringvarpið, RUV, at avgerðin kom óvæntað.

Nú bíðar russiska sendistovan eftir nærri boðum frá russisku myndugleikunum um næsta stig.

Fakta:

AFP-tíðindastovan skrivar, at Ísland var fyrsta landið, sum gavst við øllum virksemi á sendistovu síni í Russlandi, eftir russisku innrásina í Ukraina.

Fleiri lond hava síðani minkað um virksemi sítt á sendistovum í Russlandi, skrivar íslendska kringvarpið.