Støkk fekk mest á fimleikagalla

Føroyska fimleikaárið endaði um vikuskiftið við gallaveitslu, har tey bestu vórðu heiðrað. Støkk úr Runavík skaraði framúr.

Ársins amboðsfimleikarar vórðu Vilhelm Seyer úr Ljósinum og Astrið Nanly Breckmann úr Havnar Fimleikafelag. Rúni Lamhauge gjørdist ársins venjari í amboðsfimleiki við monnum, meðan ársins venjaratoymi hjá kvinnunum vórðu Remi Christiansen, Sólgerð Joensen og Anna á Fløtti Anthoniussen úr Flog.

Í estetiskum fimleiki fingu Lea Sundberg Eliasen og Gertrud Tórdóttir heiðurin sum ársins venjaratoymi. Tær eru venjarar hjá smágentunum, Norma, úr Ljósinum.

Aleksandra Fríðudóttir úr fimleikafelagnum Støkk varð vald at vera ársins stjørnuskot, meðan heiðurin fyri ársins lið eisini endaði í Runavík. Tað vunnu kvinnuunglingarnir hjá Støkk, Rósan, sum eisini vunnu FM-heitið í estetiskum fimleiki.

Støkk fór avstað við nógvum. Gentuliðið, Svalan, hjá Støkk vann heiðurin fyri ársins seriu, og fimleikafelagið, sum heldur til í Bylgjuni, vann eisini "ársins heiður" fyri átakið "felagsliðið", sum leggur dent á at bøta um samanhaldið, trivnaðinog felagsliðið. Smágentuliðið, Luna, úr Støkk fingu heiðurin fyri ársins drakt, sum var ljósareyð, hóskaði til aldurin, rørslurnar og tónleikin.