Ian Dam nýggjur stjóri í Flogbóltssambandinum

Nevndin í Flogbóltssambandi Føroya hevur gjørt av at seta Ian Dam sum stjóra í Flogbóltssambandinum. Ian avloysir Beinir Kristiansen, sum í tvey ár hevur sitið í starvinum og staðið fyri at byggja upp skrivstovu fyri FBF, sigur sambandið í tíðindaskrivi. 

Sera nógv virksemi er í føroyskum flogbólti, verður sagt. 

Fyri umleið tveimum árum síðani gjørdi FBF av at seta ein stjóra at standa fyri at byggja upp eina skrivstovu, sum kundi umsita økta virksemið, og ganga á odda í broytingartíðini. 

Hesi tvey árini hava landsliðini luttikið í størri altjóða kappingum, ein flogbóltsskúli er settur á stovn, og allir dystirnir í Føroya Tele deildunum verða vístir í Televarpinum.

Ian Dam byrjar í starvinum sum stjóri fyri føroyskan flogbólt tann 1. august.