Fara nú at umvæla og umbyggja skúlabygningarnar

Løgtingið hevur endaliga samtykt at heimila landsstýrismanninum í barna- og útbúgvinarmálum at  fara undir verkætlanina at høvuðsumvæla og umbyggja skúlabygningarnar á Frælsinum í Havn.

Í fyrsta umfari verða tekjan og útveggirnir á lon 5 umvæld, og eitt fyribils parkeringsøki verður gjørt á fløtuni á Frælsinum.

Kostnaðurin er mettur til 24 milliónir kr.

Fyrireika heildarætlan

Ein heildarætlan fyri umvæling  og komandi nýtsluna av skúlabygninginum sum partur av Kampus verður nú fyrireikað, sigur Barna- og útbúgvingarmálaráðið.

Talan er um fyrsta stig í tí stóru kampusætlanini, ið leggur upp til at byggja tríggir bygningar, sum eru tilsamans 20.000 fermetrar. Haraftrat skulu umleið 8.500 fermetrar umvælast, og parkeringskjallari gerast. 

Í næstu viku verður vinnandi uppskotið av arkitektakappingini til felagsbygning til Kampus avdúkað, upplýsir Barna- og útbúgvingarmálaráðið.