Vár hoppaði og dansaði av gleði

Vár G. Hansen er úttikin til danska U23-landsliðið, ið skal kappast til U23-HM í Bulgaria í juli, og harvið hava Føroyar hava fingið enn ein rógvara á danska rógvilandsliðið.

Tað eru bara 10 mánaðir, síðani at Vár flutti til Danmarkar at rógva, og tá setti hon seg í ein skullara fyri fyrstu ferð. 

Um ein mánað skal hon rógva í HM-kapping fyri U23 í danska dupultfýraranum.

 

 Vár Hansen, sum eisini hevur gjørt vart við seg í føroyskari rógving, er tikin út til danska U23-landsliðið og skal kappast í danska ferskullaranum til heimsmeistaraheitin í næstum.

 - Tað er fantastiskt, stórt og rørandi. Tað kennist framvegis óveruligt, hóast eg hevði sum mál at røkka U23-HM á onkran hátt, tá ið eg fyri fyrstu ferð setti meg í ein skullara í august í fjør, sigur Vár Hansen.

Í fjør flutti Vár Hansen til Århus við tí ætlan at rógva á hægri stigi. Hon venur nú tvífalt so nógv sum hon gjørdi í Føroyum - umleið 18 tímar um vikuna - og tá er fyrireikingartíðin ikki tald upp í. 

 - Ætlanin er ikki at steðga her, men at vita hvussu nógv eg kann menna meg, og hvussu langt eg kann røkka. Dreymurin er at rógva fulla tíð, sigur hon.

 

Heimsmeistaraheitini verða í Plovdiv í Bulgaria 19. - 23. juli, og ætlanin er at liva upp til vónirnar hjá sambandinum.