U21-HM heldur fram í Kringvarpinum

Síðstu vikuna hava føroyingar havt gleði av at síggja Elias á Skipagøtu, Hákun West av Teigum og hinar á U21-hondbóltslandsliðnum vinna seg úr bólkaspælinum í Magdeburg til miðumfarið í Hannover. Nú er bert endaumfarið í Berlin eftir.

Angola, Japan, Spania, Brasil og Portugal. Øll máttu lúta fyri føroysku hondbóltsúrmælingunum, sum nú teljast millum átta tey bestu U21-landsliðini í heiminum.

'Then we take Berlin'

Føroyar eru nú tríggjar dystir frá heimsmeistaraheitinum. Í fjórðingsfinaluni hósdagin bíðar Serbia, og um tað eydnast at vinna, skulu føroyingarnir royna seg ímóti annaðhvørt Danmark ella Týsklandi í hálvfinaluni. Sjálv finalan verður í Max-Schmeling-Halle sunnudagin klokkan 17.00.

Kringvarpið vísir allar dystirnar hjá føroysku U21-monnunum. Eisini hava vit fólk á staðnum, sum borðreiða við tí feskasta úr landsliðsleguni.