Ein góð byrjan í Álandi

Nú fimleikur ikki er partur av oyggjaleikunum á Guernsey, sum byrja um fáar dagar, hava tíggju oyggjar sligið seg saman um einar fimleikaoyggjaleikir, sum vera hildnir í Álandi. 

14 føroyskir fimleikarar eru við, og tey hava øll kappast  og longu fingið heiðursmerki.

Fyrsti føroyingur í kapping var Marin Danielsen, sum kappast í unglingabólkinum, og hon vann trygt samanløgdu kappingina framman fyri 34 øðrum íðkarum. Hon vann harumframt gull í forskotnari barr og góliv og bronsu í lopi.

Síðan vóru tað liðkappingarnar hjá ávíkavist kvinnum og monnum, sum eisini góvu medaljur fyri einstøku amboðini. Í hesari kappingini gera øll somu íðkan, og endaði hetta við føroyskum gulli til menninar og silvur til kvinnurnar.

Anna Sofía Bjarnastein vann gull í gólvi, sum hon deildi við Astrid Nanly Breckmann. Astrid vann eisini silvur í lopi.

Hjá monnunum vann Aron D. Jacobsen gull á gólvi, í beinsveiggi, ringum og paralellari barr, umframt at hann fekk silvur í lop og rekk.

Hjálmar Dalsgarð vann silvur í lopi og bronsu í ringum og rekk.

Rókur Vestergaard vann gull í lopi og í beinsveiggi.

Bjarki Johannesen vann bronsu í beinsveiggi og Bjarki í Jákupsstovu vann bronsu í lopi.

Í dag er hvílidagur og í morgin skulu fimleikararnir aftur kappast, hesaferð í FIG.