Eingin avgerð tikin um Koks

- Eingin avgerð er tikin enn, nær Koks flytur aftur til Føroya.

Tað sigur Johannes Jensen, stjóri í Gist & Vist, sum eigur Koks.

Annað árið á rað húsast føroyskan matstovan í Ilimanaq í Grønlandi, og tann 10. septembur letur hon aftur fyri í ár.

Johannes Jensen

Johannes Jensen er stjóri í Gist og Vist.

- Tað verður ikki fyrr enn einaferð í august, at vit taka nakra avgerð um, hvussu vit halda fram við Koks, sigur Johannes Jensen.

Hann vil heldur ikki siga, um tað er upp á tal at flyta Koks aftur til Kirkjubøar, ið var seinasta føroyska adressan hjá matstovuni, ið hevur tvær Michelin-stjørnur.

- Tað stutta av tí langa er, at vit hava onga avgerð tikið um nakað enn, sigur Johannes Jensen.

Á heimasíðuni hjá Koks stendur, at matstovan hevur opið í Ilimanaq, “til bygd verður nýggj matstova í Føroyum”.