Landsstýrið og SEV fund um pumpuskipanina í Vestmanna

Skipanin er dýrkað 400 milliónir kr., og tí má landið onkursvegna vera við, sigur formaðurin í stýrinum hjá SEV

Pumpuskipanin, sum upprunaliga kostaði eina milliard krónur, er nú vorðin góðar 400 milliónir dýrari.Skipanin, sum upprunaliga kostaði eina milliard krónur, er nú vorðin góðar 400 milliónir dýrari. (Savnsmynd: SEV)

Høgni Djurhuus

20.07.2023 - 08:27

Í dag klokkan tíggju verður fundur í Húsahaga millum Ingilín Strøm, landsstýriskvinnu í umhvørvismálum, og stýrið hjá SEV um pumpuskipanina hjá SEV í Vestmanna.

Skipanin, sum upprunaliga kostaði eina milliard krónur, er nú vorðin góðar 400 milliónir dýrari.

- Hon er nú vorðin so dýr, at landið má onkursvegna vera við, sigur formaðurin í stýrinum hjá SEV, Kári Johansen.

Ognartøka

Hann hugsar millum annað um, at landið má gera tað lættari og skjótari hjá SEV at fáa fatur í tí lendi, sum skal brúkast til vindmyllulundir.

Kári Johansen nevnir heimildina um ognartøku, sum er í lógini um Eysturoyartunnilin og Sandoyartunnilin.

Har stendur, at landsstýrismaðurin kann ognartaka neyðugt lendi ella tilfar fyri at fremja verkætlanina, um so er, at semja ikki verður fingin við tey, sum hava rættindi yvir lendinum ella tilfarinum.

Landsstýrismaðurin kann síðani avhenda tað ognartikna til felagið fyri útveganarkostnað.