Sprotin verður ókeypis minst fimm ár afturat

Tað verður eisini ókeypis at nýta talgildu orðabøkurnar hjá Sprotanum í minsta lagi í fimm ár afturat.

Almanna- og mentamálaráðið, Sprotin og Kommunufelagið hava í dag longt og víðkað verandi sáttmála við fimm árum afturat. 

Almanna- og mentamálaráðið boðar frá, at umframt verandi orðabókavirksemi á alnótini skal arbeiðið við japanskari, portugisiskari og grønlendskari orðabók eisini fullfíggjast.

Og í serskiltari avtalu millum landið og Sprotan hevur landið nú eisini tryggjað sær forkeypsrætt til skipanina, um so er, at felagið gevst, ætlar at avhenda síni rættindi, ella um Sprotin heilt ella lutvíst skiftir eigara.