Villeiðandi lýsing frá Nema

Tað er at villleiða kundan, tá ein handil lýsir við avsláttur á einari vøru, sum ikki longur er til sølu. 

Tað staðfestir Brúkaraumboðið, eftir at ein kundi vísti til eina Facebook-lýsing hjá fyritøkuni Nema, har lýst bleiv við, at sparast kundi upp til 2.300 krónur. Men tá farið var inn á leinkjuna var eingin slíkur avsláttur at síggja. 

Fyri Brúkaraumboðinum hevur Nema upplýst, at talan var um eina vøru - eina fartelefon av merkinum Samsung Galaxy Z Flip - har til bar at spara 2.300 krónur. Men tað vóru bara 3 fartelefonir til sølu fyri hendan avslátturin. 

Tær blivu seldar beinanvegin, og var vøran tískil ikki longur at finna á nethandlinum. 

Hetta er tó ikki nóg gott, metir Brúkaraumboðið, sum hevur heitt á Nema, um at vísa sjónliga á síðuni við niðursettum vørum, at vøran var útseld. Harumframt skal tað upplýsast, tá tilboðið snýr seg um eina vøru við avmarkaðari nøgd. 

Brúkaraumboðið staðfestir eisini, at talan var um eina villeiðandi lýsing, tí teksturin legði upp til, at sparast kundi upp til 2.300 kr. við at keypa eina Apple fartelefon ella Apple farteldu. 

Men hetta var ikki rætt. Tað mesta, sum kundin spardi við at keypa eina Apple fartelefon var 1.602 kr. og tað mesta, kundin spardi við at keypa eina Apple farteldu var 1.000 kr.

Samsung-telefonin varð hinvegin ikki nevnd í lýsingartekstinum.

Nema hevur strikað lýsingina, og ger Brúkaraumboðið tí ikki meira við málið.