Beinta í Jákupsstovu við nýggjari bók um fólkaræði

Ein spildurnýggj bók um fólkaræði er komin í handlarnar. Tað er Beinta í Jákupsstovu, professari, sum hevur skrivað bókina, sum ber heitið "Fólkaræði - hvat, hví og hvussu".

Fólkaræði er eitt stórt og fjølbroytt evni, ið er átrokandi at viðgera í hesum tíðum. Eftir at Berlinmúrurin fall í 1989, gekk fólkaræðið sína sigursgongd kring heimin, men seinastu áratíggjuni hava aðrar stýrisskipanir tikið seg fram og lagt fólkaræðið undir trýst. Fólkaræði er ikki nøkur sjálvfylgja, men má verjast og røkjast fyri at kunna mennast, skrivar Nám um bókina. 

Bókin er bæði ætlað 1. árs-lesandi á Søgu- og samfelagsdeildini á Fróðskaparsetrinum og sum ískoytistilfar til miðnámslesandi í samfelagsfrøði, søgu og heimspeki, ið ynskja at kava djypri niður í evnið fólkaræði, t.d. í verkætlanararbeiði ella tvørfakligum samstarvi. Eisini hevur bókin almennan áhuga fyri øll, ið ynskja eina innleiðslu til evnið.

Bókin er stutt og um stór evni, men Nám vónar, at bókin kann vera ein stuðul til at skilja og meta um aðrar tekstir um fólkaræði, samstundis sum bókin er ein brellbiti til at lesa meira um evni.