KÍ-fjepparar í Molde: Til Molde við ommu

Spenningurin er øgiligur, nú dysturin millum KÍ og Molde FK nærkast. Ongantíð áður hevur eitt føroyskt lið spælt seg so langt í Champions League-kappingini, sum eisini er sterkasta fótbóltskappingin í heiminum. 

Og tað er eisini spenningur millum teir mongu fjeppararnar, sum hava lagt leiðina til Noregs.  

Millum mongu fjeppararnar er eitt nú Kalli Váðklett, sum er einasti fjeppari við sermerktu, grønu spælaratroyggjuni hjá tí annars bláa liðnum. Hann er farin til Molde við ommu síni, og hann gleðir seg, til dysturin verður bríkslaður í gongd. 

80 ár millum yngsta og elsta fjepparan

Sambært Molde FK vera gott og væl 9.600 áskoðarar til dystin í kvøld, og øll áskoðaraplássini hjá KÍ eru seld. 

Tvey full flogfør eru farin úr Føroyum við spentum fótbóltsáskoðarum í øllum aldri.

Lítla Anna Maria Rasmussen er við sínum sjey mánaðum helst yngsti KÍ-fjepparin, sum verður at finna á Aker Stadium í Molde í kvøld.  Meðan 81 ára gamli Jákup Ziskason er elstur í ferðalagnum: 

Beinleiðis í sjónvarpinum

Dysturin verður bríkslaður í gongd klokkan 18.00. Kringvarpið vísir dystin beinleiðis í sjónvarpinum, og vit byrja at senda klokkan 17.50.

Hetta merkir eisini, at Dagur og vika er á skrá fyrr enn vanligt. Í kvøld byrjar Dagur og vika klokkan 17.30. 

Gev eisini gætur, at Kringvarpið einans hevur rættindi at vísa dystin i Føroyum.