Ov nógvir valmøguleikar og ov høgar væntanir ávirka sálarheilsuna hjá ungum

Ov nógvir valmøguleikar og ov høgar væntanir hava neiliga ávirkan á sálarheilsuna hjá ungum 

Tað eru tvær av niðurstøðunum í eini kvalitativari kanning um sálarheilsuna hjá ungum føroyingum, ið er gjørd fyri Fólkaheilsustýrið í 2019. 

Ein av teimum, sum hevur verið við til at gera kanningina, er Monika Mohr, fulltrúi hjá Fólkaheilsustýrinum.

Úrslitini frá fólkaheilsukanningini hjá Fólkaheilsuráðnum í 2019 vístu millum annað, at tað serliga eru ung millum 18-34 ár, ið meta seg hava ringastu sálarligu heilsuna. 

Ein onnur niðurstøða í kanningini er, at avmarkingarnar av at búgva í einum lítlum samfelag sum tað føroyska ávirkar eisini sálarheilsuna. Hesar avmarkingarnar snúgva seg millum annað um, hvørjar útbúgvingar hóska til arbeiðsmøguleikar á heimstaðinum, serliga uttanfyri miðstaðarøkið.

Monika Mohr, Vár Honnudóttir, Magni Mohr og Annika Helgadóttir Davidsen hava gjørt kanningina.