Føroysk skip sleppa ikki at landa í Íslandi

Morgunblaðið hevur spurt íslendska matvøruráðið, hví føroysk skip ikki sleppa at landa makrel í Íslandi? Svarið var greitt:

Sambært íslendskari lóg er ikki loyvt útlendskum skipum at landa í Íslandi, hava tey fiskað úr stovni, sum lond ikki eru samd um, hvussu skal býtast millum londini.

Morgunblaðið skrivar, at undantak kann tó gevast frá lógini.

Íslendsk skip landa makrel í Føroyum.

Børkur var nú í vikuni í Føroyum við 2.100 tonsum av makreli.

Føroyska fiskimálaráðið spurdi í farna mánaði, um føroysk skip kundu landa makrel í Íslandi, men svarið haðani var nei. 

Men skipini sleppa at landa í Noregi.

Føroysk skip sleppa at landa makrel uttanlands til 31.august, so tey ikki noyðast at bíða so leingi eftir at sleppa framat í Føroyum.