Rentan hækkar aftur

Rentan hækkar aftur nú í triðja ársfjórðingi.

Landsbankin hevur gjørt útlánskanning fyri Váðaráðið.

Sambært henni vænta allir fýra peningastovnar, at teir fara at herða kredittkrøvini aftur í triðja ársfjórðingi.

Tað verður gjørt við at hækka útlánsrentuna. Rentan hækkaði eisini í øðrum ársfjórðingi.

Hóast kredittkrøvini soleiðis eru herd, siga peningastovnarnir, at eftirspurningurin hjá kundunum eftir lánum er ikki broyttur. 

Skuldarlutfallið framvegis lítið

Fyribils hagtøl vísa, at húsarhaldini, sum skylda meira enn tvær mió. kr. og meira enn tríggjar ferðir ársinntøkuna, vóru 4,1 prosent í fjør.

Tey vóru 3,6 prosent í 2021.

Yvirskipað er skuldarlutfallið hjá føroysku húsarhaldunum framvegis lítið. 

Rentuhækkingar raka tey tó alt fyri eitt, tí 88 prosent av skuldini hjá teimum hevur broytiliga rentu, sigur Landsbankin.