Ongar reglur á veg um almennar stjóralønir

Ongar reglur eru á veg úr landsstýrinum um lønina hjá stjórum í almennum partafeløgum.

Lønirnar eru javnan uppi og venda, tí nógv halda, at tær eru ov stórar, ella alt ov stórar.

Seinast var mikudagin, tá nevndarformaðurin hjá Posta, Joen Magnus Rasmussen, ikki vildi siga, hvussu lønin hjá nýggja stjóranum á Posta verður.

Lønin hjá fráfarna stjóranum, Joel undir Leitinum, var 1,4 milliónir krónur í fjør, á leið tað dupulta sum løgmaður fær.

Eigarapolitikkur

Bjarni Kárason Petersen, sum varðar av Posta í landsstýrinum, sigur, at lønir hoyra til eigarapolitikkin, sum løgmaður umsitur.

Í eigarapolitikkinum, sum kom í fjør summar, stendur einki um lønir.

Men har stendur millum annað, at fyritøkur hjá landinum skulu virka eftir somu treytum sum kappingarneytarnir.

Av Løgmansskrivstovuni frættist, at har verður ikki arbeitt við eigarapolitikkinum í løtuni.