Ole Wich fekk Sømdargávu landsins

Sirið Stenberg, landsstýriskvinna í mentamálum, hevur júst handað Ole Wich, listamanni, Sømdargávu landsins. 

Sømdargáva landsins er 20.000 krónur um árið, og hon verður latin listafólki, ið hava útint listarligt avrik, ið verður mett at hava týdning fyri samtíð og framtíð.

Listaliga virksemið hjá Ole Wich er rúgvismikið og fjølbroytt og fevnir um alt frá standmyndum, installatiónum, video, foto, list í almenna rúminum til plátuhúsar og frímerki. 

Virkað í Føroyum í ein mansaldur

Ole Wich hevur búð og virkað í føroyska samfelagnum í meir enn ein mansaldur.

Sum myndlistamaður hevur Ole prikað til fatanir av føroysku tjóðini og hevur mangan elvt til kjak.

Eygleiðingin hjá Ole Wich av føroyska samfelagnum er áhaldandi og beinrakin, og hon sæst aftur í einum týðandi íkasti á føroyska mentanarpallinum.

Fyri útint listaligt avrik fær Ole Wich Sømdargávu landsins.