Hann hevur búð í økinum síðan seinnu helvt av 60unum, og hevur tí fingið alt við, tá tað kemur til byggingina av brúnni um Streymin, ið varð tikin í nýtslu í 1973.

Ikki kann sigast annað enn, at brúgvin hevur havt stóran týdning fyri økið kring Oyrabakka, har Edmund Joensen og familjan hava húsast sum nærmastu grannar hjá brúnni.

- Áðrenn brúgvin kom, búðu vit 'bara' í Eysturoynni, meðan vit nú búgva í mið-Føroyum, og tá máttu vit við báti, um vit skuldu til Havnar til dømis.

Nýggja ferðslusambandið hevði við sær, at víðari útbyggingar vórðu gjørdar víðari, soleiðis at sundalagsfólk brádliga høvdu samband við bæði Skálafjørðin og bygdirnar á eystursíðuni á Eysturoynni og við Norðuroyggjar. Hetta var sum vera mann kollveltandi fyri økið kring brúnna.

- Tað hevði við sær, at alt samfelagið her broyttist. Bæði ferðamátar og handilsviðurskifti broyttust, tí vit fingu bæði heilsølu- og oljubilar í túnið, og menningin tók ferð á seg.

Møguleikarnir frameftir eru eisini nógvir, kanska serliga tí Sunda kommuna fevnir um eitt so stórt øki við góðum upplandi, har pláss er fyri stórari menning og bygging.