Setrið og Kommunufelagið fara í granskingarsamstarv

Fróðskaparsetur Føroya og Kommunufelagið hava gjørt fimm ára avtalu um at menna og skipa granskingarsamstarv.

Samstarvsavtalan eitur SetursKom, og tað eru Magni Mohr, vararektari fyri gransking á Setrinum, og Tórbjørn Jacobsen, formaður í Kommunufelagnum, sum hava skrivað undir avtaluna. 

Høvuðsdenturin í henni er at menna verkætlanir um gransking og nýmenning.

Stórt virkisøki

- Kommunurnar í dag hava stórt og alsamt vaksandi virkisøki. Meira enn triðja hvør almenn skattakróna verður nú brúkt til at røkja uppgávur í kommunala geiranum. Talan er um alt, frá tekniska undirstøðukervinum í kommununi til allar borgararelateraðar tænastur, frá vøggu til grøv, sigur Tórbjørn Jacobsen.

Uppgávurnar, sum formaðurin í Kommunufelagnum tosar um, vaksa skjótt í vavi, bæði á tekniska og fysiska økinum, eins væl og á sosiala økinum. Virkisøkið er umftanadi, og fyri at reka tað skynsamt, krevst vitan og nýhugsan.

Universitetsskommunuskipan

- Heimurin broytist skjótt, og dagsins samfelag krevur snildar og burðardyggar loysnir. Kommunurnar hava nógvar avbjóðingar í dag, sum tykjast vaksa, sum tíðin líður.

- Hetta vilja vit á Setrinum hjálpa kommununum við og ætla at menna eina føroyska universitetskommunuskipan, har gransking verður sett í verk á kommunalum stigi, og har granskingargrundaðar loysnir verða mentar, sigur Magni Mohr, vararektari fyri gransking á Fróðskaparsetrinum.