Hótta við at lýsa verkfall fyri allar sjúkrarøktarfrøðingar í stundini

Sáttmálatrætan millum Felagið føroyskir sjúkrarøktarfrøðingar  og Fíggjarmálaráðið harðnar í hvørjum.

Í brævi, sum felagið hjá sjúkrarøktarfrøðingunum hevur sent Akseli V. Johannesen, løgmanni, og sum Óluva í Gong, forkvinna, hevur skrivað undir, verður sagt, at um løgmaður ger seg inn á avtaluna um fráboðanarform og fráboðanarfreist undan arbeiðssteðgi við at leggja lógaruppskot fyri tingið, sær Felagið føroyskir sjúkrarøktarfrøðingar seg ikki bundnan av avtaluni longur, og lýsir arbeiðssteðg fyri allar sjúkrarøktarfrøðingar, ið starvast á sáttmálaøkinum, har sáttmálin millum Fíggjarmálaráðið og Felagið føroyskir sjúkrarøktarfrøðingar er galdandi.

Verkfallið kemur í gildi í somu løtu, sum tað er lýst.

Sjúkrarøktarfrøðingar stuðulsgongu

Frá stuðulsgonguni til frama fyri Felagið hjá sjúkrarøktafrøðingunum fríggjadagin. (Mynd: Bjarni Árting Rubeksen)

Felagið sigur víðari:

Tað er vorðið okkum heilt greitt, at Fíggjarmálaráðið als ikki hevur viljað funnið semju, men hevur í staðin roynt at kroyst okkum til eina støðu, har vit máttu siga her til og ikki longur.

Hetta verður nú brúkt fyri at fáa Løgtingið at avgreiða málið fyri seg.

Har er ríkiligt av rúmi at samráðast, um Fíggjarmálaráðið bert sleppur sínum ultimatum, stendur í skrivinum frá Felagnum føroyskir sjúkrarøktarfrøðingar til løgmann. 

Les brævið her.