Terje leggur semingsuppskot fyri partarnar

Eftir at Semingsstovnurin fyrr í dag hartaði partarnar fyri ikki at vísa veruligan vilja til at flyta seg, tykist gongd nú vera komin á royndina at finna semju millum Felagið Føroyskir Sjúkrarøktarfrøðingar og Fíggjarmálaráðið.

Tað er Semingsstovnurin sjálvur, sum hevur tikið initiativ til hetta stigið.

-Jú, tað er okkara initiativ, at vit nú hava orðað eitt nýtt semingsuppskot, sigur Terje Sigurðsson, og sipar til sera fastløstu støðuna eftir at løgtingið í gjárkvøldi við lóg legði seg út í verkfallið.

Partarnir eru boðsendir at møta á skrivstovuni hjá Semingsstovninum klokkan 11 fyrrapartin í morgin, har tey skulu taka støðu til semingsuppskotið.

Um orsøkina til hetta stigið vísir Terje Sigurðsson á óvanligu og fastløstu støðuna júst nú.

-Tað er lítið sannlíkt, at partarnir sjálvir koma saman fyri at finna semju í einum dialogi. Har eru vit ikki. Tí hevur Semingsstovnurin tikið hesa avgerð, sigur Terje Sigurðsson.

Sjúkrarøktarfrøðingar stuðulsgongu, 16:9

Verkfallið byrjaði 2. oktober, og Semingsstovnurin hevur verið partur av hesi sáttmálatrætu síðani einaferð í september. 

-Tí kenna vit eftirhondini rættuliga væl sjónarmiðini hjá báðum pørtum, og við støði í tí hava vit orðað eitt nýtt semingsuppskot, sigur Terje Sigurðsson.  

Við útvarpið fyrr í dag segði Terje Sigurðsson, at skal nakað broytast í fastløstu støðuni, so mugu báðir partar greitt vísa ein veruligan vilja til at flyta seg. Tað gjørdi hann, eftir at løgtingið í gjárkvøldi legði uppí verkfallið, omnnur fakfeløg fóru í samhugaverkfall, og tað tyktist ísakalt millum stríðandi sáttmálapartarnar.

Felagið Føroyskir Sjúkrarøktarfrøðingar, Óluva í Gong