Sáttmálin við sjúkrarøktarfrøðingar fer at ávirka aðrar sáttmálar

Langt hevur verið millum partarnar, men í gjár glapp, og semja var gjørd, sigur Ruth Vang, landsstýriskvinna

Terje Sigurðsson, semingsmaður, og Ruth Vang, landsstýriskvinna. Í gjár glapp, og nú er nýggjur sáttmáli gjørdur við Felagið føroyskir sjúkrarøktarfrøðingar. (Savnsmynd: Bjarni Árting Rubeksen)

Ruth Winther Poulsen

15.11.2023 - 12:15

Seks vikur og ein dagur gingu, til tað eydnaðist Fíggjarmálaráðnum og Felagnum føroyskir sjúkrarøktarfrøðingar at semjast um nýggjan sáttmála.

Ruth Vang, landsstýriskvinna í fíggjarmálum, sigur, at langt hevur verið millum partarnar, men eina løtu í gjár glapp, og alt annað enn at gera semju hevði verið tápuligt, sigur hon.

Ruth Vang og Óluva í Gong

Ruth Vang og Óluva í Gong, tá skrivað var undir nýggja sáttmálan í gjár. (Mynd: Felagið føroyskir sjúkrarøktarfrøðingar)

Fíggjarmálaráðið og Felagið føroyskir sjúkrarøktarfrøðingar hava gjørt trý ára sáttmála, og lønarhækkingin er tilsamans umleið 10 prosent í sáttmálaskeiðnum.

Ruth Vang sigur, at sáttmálin við sjúkrarøktarfrøðingarnar fer at ávirka aðrar sáttmálar, sum skulu gerast á almenna arbeiðsmarknaðinum.

Hoyr innslag í útvarpstíðindunum:

15112023_Ruth_um_sattmala