Talgildur bíðilisti til barnaansing í Havn

Seinnapartin í dag verður bókingarskipanin BARN hjá Tórshavnar kommunu sløkt. 

Í staðin fyri hana kemur talgildur bíðilisti.

Fyri foreldur merkir hetta, at tey ikki longur skulu leita eftir plássum í dagstovni í Tórshavnar kommunu. 

Í staðin skulu tey skráseta barnið á bíðilista hjá í mesta lagi fýra stovnum. 

Tey, sum longu eru á ynskilista, varðveita hetta plássið sum fremstu raðfesting, og kunnu so skriva barnið upp til tríggjar stovnar aftrat.

Sannlíkindi at fáa pláss

Við at geva foreldrum fleiri valmøguleikar økjast sannlíkindini fyri, at pláss verður í einum av teimum fýra raðfestu valmøguleikunum tá brúk er fyri plássinum, sigur Tórshavnar kommuna.

Tá pláss er tøkt, fáa foreldrini boð um hetta í Mínboks. 

Upptøkureglugerðin hjá Tórshavnar kommunu verður eisini dagførd. 

Ein broyting verður, at dagstovnar fara at taka børn inn fýra ferðir um árið, 1.februar, 1.mai, 1.september og 1.november. 

Miðað verður eftir at leysgeva fyrstu plássini fyrst í desember. 

Kommunan heitir á foreldur um at skráseta barnið á bíðilistarnar skjótast gjørligt og helst fyri 1.desember.