Biðja nú um 45 milliónir aftrat til fámjinsbergholið

Fiskivinnu- og Samferðslumálaráðið hevur nú biðið løgtingið broyta verklagslógina um bergholið til Fámjins.

Lógin frá 19.apríl í fjør sigur 207 mió. kr.

Broytingaruppskotið sigur 252 mió. kr.

Sambært tí kostar bergholið 45 mió. kr. meira enn væntað var í fjør.

Síðst í oktober 2021 játtaði løgtingið 169 mió. kr. til bergholið.

Orsøkin til, at bergholið verður dýrari, er, at tilfarið í fjallinum er sera vánaligt.

Tvey stór omanlop hava verið í bergholinum.

Dýrkar 45 milliónir

Fyrra omanlopið, sum var í apríl, verður mett at dýrka verkætlanina 15 milliónir.

Størra omanlopið, sum var 9.oktober, verður fyribils mett at kosta 30 milliónir.

Í uppskotinum um fíggjarlóg fyri 2024 eru 84 milliónir til bergholið til Fámjins.

Men 88 milliónir skulu brúkast næsta ár.

Neyðugt er tí at játta fýra milliónir aftrat næsta ár, sigur Fiskivinnu- og Samferðslumálaráðið.