Kunnu fiska meiri hýsu, men minni av upsa

Altjóða havrannsóknarstovnurin ICES kunngjørdi í dag nýggjastu ráðgevingina fyri hýsu og upsa í føroyskum sjógvi.

Ráðgevingin byggir á nýggjastu stovnsmetingarnar av hesum fiskastovnum.

ICES mælir til, at veiðan av hýsu í 2024  verður í mesta lagi góð 12.000 tons, sum eru trý prosent meira enn tilmælið fyri í ár, skrivar Havstovan.

Hýsustovnurin var í tíðarskeiðnum frá 2008 til 2017 undir markinum, har serlig verjutiltøk eru neyðug. Hýsustovnurin kom upp um hetta markið í 2018, og hevur verið á miðalstigi síðani.

15.300 tons av upsa

ICES mælir hinvegin til at minka upsaveiðuna niður í 15.300 tons næsta ár. Tað eru 14 prosent minni enn tilmælið fyri 2023, og orsøkin er minni tilgongd til stovnin síðstu árini.

Toskurin á landgrunninum var í fjør mettur at vera undir markinum, har serlig verjutiltøk eru neyðug. ICES mælti tá til, at toskur ikki verður fiskaður á landgrunninum í ár og næsta ár, og kemur tí ikki við nýggjum tilmæli í ár.

Tilmælið fyri tosk á Føroyabanka, sum kom í fjør, er galdandi fyri tvey ár í senn.

Sí meira her