Brúk fyri fleiri fólkum á Útlendingastovuni

Útlendingastovan hevur nú so nógv at gera, at neyðugt er at seta ein løgfrøðing aftrat 1. apríl næsta ár.

Landsstýrið hevur tí biðið fíggjarnevndina hækkað játtanina hjá Útlendingastovuni í 2024 500.000 kr.

Útlendingastovan hevði 1.122 mál í 2018. Í 2022 vóru tey 2848. Og næsta á fer talið upp í 3000.

Yvirtaka umsiting

Útlendingastovan fer væntandi at yvirtaka umsitingina av arbeiðs- og uppihaldsloyvum og familjusameining fyrst í 2024. 

Men lagt er ikki upp fyri tí í fíggjarlógaruppskotinum fyri 2024, sigur landsstýrið.

Tað sigur, at tá øll umsitingin er yvirtikin og farin at virka, hevur Útlendingastovan brúk fyri trimum ella fýra starvsfólkum aftrat.