Pedagogfelagið: Tvørligar sáttmálasamráðingar

"Tvørligar sáttmálasamráðingar," er yvirskriftin í nýggjasta Pedagogblaðnum, har formaðurin í Føroya Pedagogfelag lýsir síni sjónarmið í gongdini í sáttmálasamráðingunum við Fíggjarmálaraðið og Kommunala arbeiðsgevarafelagið

Í greinini nevnir Jógvan Philbrow fleiri økir, sum gera tað trupult at samráðast.

Men tað eru serliga arbeiðstíðarreglurnar, sum arga, eins og tað gjørdi hjá sjúkrarøktarfrøðingunum, stendur í greinini.  

Tí, sum felagið sigur í greinini, so skulu arbeiðstíðarreglur í fyrsta lagi leggja upp fyri, at nógvir námsfrøðingar og hjálparfólk arbeiða skeivar tíðir ella í vaktum.

Arbeiða, tá ið onnur hava frí

- Tá tú til dømis ikki arbeiðir innan fyri karmarnar á eini vanligari 40 tíma viku í dagtímunum - onkur sáttmáli hevur styttri arbeiðsviku - so arbeiðir tú, tá flest onnur hava frí. Og tá ið tú samanborið við normala arbeiðstíð, eisini átti at havt frí.

- Og har renni eg meg persónliga í nakrar gevaldigar prinsipiellar trupulleikar, tá eg hoyri retorikkin frá arbeiðsgevarasíðuni. Tí, sum eg skilji tað, krevja tey, at allir batar á økinum skulu mótroknast í karminum, sigur Jógvan Philbrow, formaður í Føroya Pedagogfelag, í Pedagogblaðnum. 

Karmurin eisini trupulleiki

Somuleiðis stendur í greinini, at sjálvur karmurin eisini er ein trupulleiki, tí felagið ikki kann góðtaka, at fyrsta sáttmálaárið skal ganga heilt til 1. apríl næsta ár, áðrenn námsfrøðingarnir fáa ta lønarhækkingina, sum onnur fáa afturvirkandi frá 1. oktober í ár. 

Vit hava roynt at fáa fingið orðið á Jógvan Philbrow, men tað hevur ikki eydnast.

Les Pedagogblaðið her.