Segði seg úr starvi, orsaka av misáliti frá landsstýriskvinnuni

Misálit frá Margit Stórá, landsstýriskvinnu í heilsumálum, var beinleiðis orsøk til, at Hans Pauli Henryson segði seg seg úr starvinum sum sjúkrahússtjóri á Suðuroyar Sjúkrahúsi.

Tað sæst í 18 síður longu frágreiðingini, sum Turið Arge, aðalstjóri í heilsumálaráðnum, hevur sent løgmansskrivstovuni í sambandi við umboðsmannamálið, har løgmansskrivstovan hevur kravt frágreiðing frá bæði Margit Stórá, landsstýriskvinnu, og Turið Arge, aðalstjóra.

Menningarfundur var millum sjúkrahúsleiðsluna og landsstýriskvinnuna fríggjadagin 16. juni í ár, og mánadagin 18.juni valdi Hans Pauli Henrysson at skriva uppsøgnina beinan vegin, ið hann kom til arbeiðis.

Í frágreiðingini frá Turið Arge sæst, at Hans Pauli Henryson í fleiri umførum hevur roynt at fingið við í fundarfrágreiðingina, hvat eftir hansara tykki hendi á menningarfundinum tann 16. juni. Men, Heilsumálaráðið hevur ikki viljað tikið hansara íkast við í fundarfrágreiðingina.

7. september, tá fundarfrágreiðingin er liðug og send út, skrivar Hans Pauli Henryson millum annað: 

Ein av mínum ítøkiligu viðmerkingum er ikki tikin við í endaligu frágreiðingina, sum nú er send mær. Hendan viðmerkingin snýr seg um álitið millum landsstýriskvinnuna og leiðsluna í Sjúkrahúsverkinum, sum eg eri partur av. Tað er SERA álvarsamt, tá landsstýriskvinnan á einum formellum fundi sigur: "Eg havi ikki álit á tykkum", og at tað ikki er gott nokk. Tí JÚST hendan útsøgn er ein av orsøkunum til, at eg havi sagt meg úr starvi sum stjóri í Sjúkrahúsverkinum og stjóri á Suðuroyar Sjúkrahúsi. Eg kann ikki liva við at vera í einum starvi, har ivi er um mína arbeiðsførðslu."

Tað skrivar altso Hans Pauli Henrysson, fyrrverandi sjúkrahússtjóri, til Turið Arge 7. september, tá hann enn einaferð ger vart við sína misnøgd um fundarfrágreiðingina frá fundinum, sum fekk hann at siga seg úr starvi sum sjúkrahússtjóri.

Meira um hetta í tíðindunum á døgurða.