Ársins Rósa: Randi Waag Jacobsen

Tá jólaskipið kom á Klaksvík í gjár, var tað ikki bert við jólamonnum og jólagávum umborð - við sær høvdu teir eisini Ársins Rósu. 

Ársins Rósa er ein árlig viðurkenning, ið verður latin fyri vælgerandi arbeiði í Klaksvíkar Kommunu.

Í grundgevingini segði borgarstjórin Karl Johansen, millum annað soleiðis: 

" Av sínum eintingum, og í tí stilla, hjálpir ársins rósa barnafamiljum, einligum foreldrum, fyritíðarpensjónistum, støkum uppihaldarum og øðrum við mati og klæðum. Hon er sera vinarlig og hjálpsom, og við sínum hjartaliga lyndi ger hon alt fyri at stuðla familjum og einstaklingum, tí ongin skal sita svagnur á jólum. Ársins rósa hevur seinastu árini sæð ein øktan tørv á at hjálpa, tí tað eru mong, sum hava tað trupult við at fáa pengarnar at strekkja til.  Ársins rósa hevur eina facebook síðu, sum eitur "Yvirskot til tín". Her kunnu fólk seta seg í samband við ársins rósu, um tey hava gávur, s um tey ynskja at geva víðari til onnur. Tað kann millum annað vera gávukort, matur ella jólapakkar. Seinastu vikurnar hevur tað víst seg, at tað eru mong, sum hava fingið stóra gleði av hjálpini, sum verður veitt í nærumhvørvinum. Eisini hevur tað víst seg, at tað eru nógv fólk, sum vilja gera mun, og tí hava tikið lut í hesum hjálpararbeiði. Vinnulív, handlar og privatpersónar, sum heild, hava á ymiskan hátt latið til endamálið. 

Við hesari hjálp og hennara hjálpandi hondum hevur tað enn einafeðr eydnast henni, saman við manninum, at samskipa eitt átak, sum ger stóran mun, og sum minnir okkum øll á týdningin av, at hugsa um okkara næsta. 

At vera nakað fyri onnur er ongin sjálvfylgja." 

Hetta er 18.ferð at ársins rósa verður latin.