Fær átalu fyri handfaring av áheitanum um óljóð

Umboðsmaðurin hevur viðgjørt eina klagu um handfaringina hjá Klaksvíkar kommunu av áheitanum um óljóð, ið stava frá virkseminum, sum er á havnarøkinum í Norðhavnini í Klaksvík. 

Umboðsmaðurin gav kommununi eina átalu fyri handfaringina av áheitanum grundað á, at Klaksvíkar kommuna ikki kundi skjalprógva fyri umboðsmanninum, at klagarin hevði fingið greiða afturboðan um, hvat kommunan fór at gera í sambandi við áheitanirnar. 

Umboðsmaðurin minti á skylduna at svara og journalisera og heitti samstundis á kommununa um at leggja upp fyri støðuni, tá býráðslimir fáa áheitanir umvegis privatar samskiftismiðlar, ið tørva eina fyrisitingarliga viðgerð. 

At enda mælti umboðsmaðurin kommununi til at gera mannagongdir og reglugerð um óljóð í sambandi við leiklutin hjá kommununi sum eftirlitsmyndugleiki á umhvørvisverndarøkinum.

Les meira her.