Fosturtøka í tinginum í dag og í morgin

Tingfólk fara at viðgera fosturtøku í dag og í morgin.

Í dag er uppskotið hjá Miðflokkinum um at verja ófødda barnið á skránni.

Og í morgin kemur uppskotið hjá Bjarna Kárasyni Petersen, landsstýrismanni, um fosturtøkulóg.

Miðflokkurin sigur, at í Føroyum eru 30 fosturtøkur um árið.

Tað eru 30 ov nógvar, sigur flokkurin.

Eingin hevur rætt at taka sær vald at avgera, hvør skal sleppa at liva, hvørki í Føroyum  ella aðrastaðni, sigur Miðflokkurin. 

Ferðslulóg

Millum nógvu uppskotini á tingfundinum í dag eru broytingar í ferðslulógini.

Dennis Holm, landsstýrismaður, eigur uppskotið.

Uppskot er um, at sektin hækkar fyri at brúka handhildna telefon ella annað handhildið samskiftistól, meðan koyrt verður, og tað skal geva klipp í koyrikortið.

Og nú skulu rúsevni koma aftrat rúsdrekka í ferðslulógina, tá ræður um revsingina at missa koyrikortið treytaleyst.

Og tað verður forboðið, sambært uppskotinum, at brúka lítil motordrivin akfør, sum til dømis rennihjól, á økjum, sum ferðslulógin umfatar.