Fótbóltsmenninir leggja til brots ímóti Liktinstein

Landsliðsárið hjá bestu fótbóltsmonnunum byrjar av álvara í dag við venjingardysti ímóti Liktinstein.

Dysturin verður spældur sum partur av venjingarlegu í Spania, áðrenn leiðin gongur til Keypmannahavn, har Danmark bjóðar av týsdagin.

Tað er álopsspælið, sum er ovast á breddanum hjá Håkani Ericson, venjara, ímóti smáríkinum, sum liggur millum Eysturríki og Sveis.

Venjarin vónar, at Føroyar fara at hava bóltin nógv á mótstøðuhálvuni og skora nøkur mál.

Skert landslið

Fleiri av spælarunum, sum hava verið fastur í hópinum síðstu árini, eru ikki við á túrinum hesa ferð. Fleiri eru skaddir, m.a. Odmar Færø, Heini Vatnsdal, Hallur Hansson, Ári Mohr Jónsson, Meinhard Egilsson Olsen og Patrik Johannesen.

Harafturat hava Jákup Biskupstø Andreasen og Jóannes Kalsø Danielsen givið avboð av persónligum ávum. 

Ringast kemur kortini við hjá Håkani Ericson, at Jóannes Bjartalíð úr Fredrikstad FK er skaddur. Fyrrverandi KÍ-miðvallarin er skurðviðgjørdur og verður ikki til reiðar fyrr enn um nakrar vikur.

adrian_hed.jpeg

Tí kann roknast við, at fleiri, sum kanska ikki hava spælt so nógvar landsliðsminuttir, fáa kjansin í dag, m.a. Adrian Justinussen, sum hevur fingið eina frálíka byrjan í sínum nýggja felagi, Hillerød.

LES EISINI: Feskur víkingur í landsliðshópinum

Kringvarpið vísir dystin í sjónvarpinum klokkan 16:50.

Skrædnaði síðstu løtuna

Føroyska U21-fótbóltslandsliðið tapti í gjár sín fyrsta EM-undankappingardyst í ár. 

Talan var um torføran dyst á útivølli ímóti Portugal, men føroyingarnir stríddust fyri sakini, og tað var málleyst, tá liðini fóru til hálvleiks.

Fábio Silva legði portugisar framum, tá 52. minuttir vóru spældir, men leingi stóð á hjá heimaliðnum, sum ikki fekk avgjørt endaliga fyrrenn tríggjar minuttir fyri leiklok.

Í yvirtíðini fekk Portugal tvey mál afturat, so tapið gørdist óneyðuga stórt.

Í september skal føroyska U21-landsliðið á vøllin aftur. Hósdagin 5. september er útidysturin móti Kroatia á skránni, og týsdagin 10. september kemur Grikkaland á vitjan á Djúpumýru í Klaksvík.