Sjúkrahúsverkið ger stóra trivnaðarkanning

Sjúkrahúsverkið biður nú um tilboð um at gera eina umfatandi trivnaðarkanning.

Endamálið er at fáa at vita, hvussu tey 1.300 starvsfólkini á teimum trimum sjúkrahúsunum trívast, bæði sálarliga og í arbeiðinum sum heild.

Trivnaðarkanningin skal geva eina mynd á øllum stigum hjá trivnaðinum hjá starvsfólkunum í Sjúkrahúsverkinum. 

Harafturat skal hon nýtast sum eitt strategiskt amboð til at varðveita og styrkja Sjúkrahúsverkið sum eitt dragandi og virkið arbeiðspláss, har trivnaður er í hásæti. 

Klaksvíkar sjúkrahús, sjúkrahúsið í Klaksvík

Klaksvíkar sjúkrahús.

Verður í heyst

Endamálið er eisini at síggja, hvussu væl virðini hjá Sjúkrahúsverkinum eru verksett, sigur Sjúkrahúsverkið í útboðstilfarinum. 

Trivnaðarkanningin, 30 til 40 spurningar, skal vera í heyst.

Úrslitini skulu vera tøk í oktober ella november. Starvsfólkini skulu vera dulnevnd í kanningini.  

Trivnaðarkanningin skal vera á minst tveimum málum, føroyskum og enskum.

Kunngjørt verður 22.mai, hvør fær arbeiðið at gera trivnaðarkanningina í Sjúkrahúsverkinum.  

Suðuroyar sjúkrahús

Suðuroyar sjúkrahús.