Ætla at byrja semingsroyndina mikudagin

Semingsstovnurin er komin upp í sáttmálasamráðingarnar á privata arbeiðsmarknaðinum, sum slitnaðu fríggjadagin.

Terje Sigurðsson, semingsmaður, sigur,  at í dag og morgin eru fundir við partarnar hvør sær, og síðani kann semingsroyndin byrja, væntandi mikudagin.

Partarnir handaðu krøvini 22. mars. Samráðingar hava verið síðani 4. apríl, tá ið fyrsti samráðingarfundur var.

Føroya arbeiðarafelag, Havnar arbeiðarafelag, Klaksvíkar arbeiðskvinnufelag og Klaksvíkar arbeiðsmannafelag samráðast saman við Arbeiðsgevarafelagnum, meðan Havnar arbeiðskvinnufelag hevur samráðingar fyri seg. 

Semingsstovnurin hevur útsett møguligan arbeiðssteðg til fríggjadagin 10. mai á midnátt.