Ísrael hevur aftur lopið á Rafah, men samráðingarnar halda fram

Samráðingarnar millum Ísrael og Hamas um vápnahvíld, at gíslar skulu latast leysir og at neyðhjálp skal til allar partar í Gasa, halda fram í dag. 

Tað sigur uttanríkisráðið í Katar. 

Yvirgangsfelagsskapurin Hamas boðaði í gjárkvøldið frá, at hann tekur undir við at leggja vápnini og at útflýggja Ísrael gíslar. 

Uppskotið um vápnahvíld er í trimum stigum, og snýr seg m.a. um 84 daga vápnahvíld, at gíslar skulu latast leysir, neyðhjálp og at Gasa skal byggjast upp aftur. 

Men Ísrael góðtekur ikki uppskotið, tí tað lýkur ikki ísraelsku krøvini.

Ísraelski forsætisráðharrin, Benjamin Netanyahu, segði í gjárkvøldið, at ísraelska krígsráðið hevur samtykt at halda fram við álopunum í Rafah fyri at leggja trýst á Hamas um at lata gíslarnar leysar.

Í gjárkvøldið fór Ísrael undir nýggj álop á Rafah. Ísraelski herurin sigur, at '50 yvirgangsmál' vóru rakt í luftálopunum á býin í gjár.

Rafah, neyðhjálp í Gasa

Síðani 7. oktober er neyðhjálp flutt um marknaliðið í Rafah, men nú er hjálpin steðgað, siga hjálparfelagsskapir. (Mynd. Reuters/Ritzau Scanpix)

Hevur valdið á marknaliðnum

Ísrael hevur tikið valdið á marknaliðnum millum Rafah og Egyptaland.

Tað skrivar ísraelska verjan á Telegram. 

Ísrael sigur, at marknaliðið verður nýtt til 'yvirgangsendamál'.

Síðani 7. oktober er neyðhjálp, sum er sloppin inn í Gasa, flutt um Rafah-marknaliðið. Henda hjálpin er nú steðgað, siga hjálparfelagsskapir. 

Ísraelski herurin sigur samstundis, at hann nú loypur á eystara part av marknabýnum Rafah, og at fólk eru rýmd úr meginpartinum av økinum, eftir at tey fingu boð um tað í gjár.