Ikki verkfall hjá kommunum og landi

Hvørki kommunurnar ella landið vera rakt, nú verkfall verður á midnátt í annaðkvøld.

Kommunala arbeiðsgevarafelagið hevur ikki sáttmála við Føroya arbeiðarafelag, Havnar 
arbeiðarafelag, Klaksvíkar arbeiðskvinnufelag og Klaksvíkar arbeiðsmannafelag, sum hava boðað frá verkfalli.

Hóast kommunurnar brúka sáttmálarnar hjá arbeiðarafeløgunum og Føroya arbeiðsgevarafelag, kunnu arbeiðarafeløgini ikki leggja niður arbeiðið á kommunala sáttmálaøkinum, sigur Per Martin Gregersen, formaður í Kommunala arbeiðsgevarafelagnum.

Hava ikki kollektivan sáttmála

Hann sigur, at felagið hevur ikki kollektivan sáttmála við arbeiðarafeløgini. 

Arbeiðsfólk hjá kommunum eru sett í starv individuelt hjá kommununi.

Tey eru tí ikki við í kollektivt lýsta arbeiðssteðginum, sigur KAF.

Arbeiðsfólk hjá kommununum, SEV og IRF fara tí ikki í verkfall.

Jan Mortensen, lønarstjóri hjá landinum, sigur tað sama sum formaðurin í Kommunala arbeiðsgevarafelagum.

Arbeiðsfólk hjá landinum fara tí heldur ikki í verkfall.

Arbeiðarafeløgini siga, at vertkfallið er fyri øll, eisini fyri tey, sum arbeiða hjá kommunum ella landi.