Lógin sigur 18 ára aldursmark

- Skalt tú koyra bil, so er aldursmarkið 18 ár, og tað góðtaka tey allarflestu, so hví ikki hava sama hugburð til rúsdrekka? spyr Jákup av Skarði, SSP ráðgevi, tá tosað verður um hugburðin hjá foreldrum um rúsdrekka hjá tannáringum.

- Tað vísir seg, at mytan um, at tað er betri at ung fáa rúsdrekka frá foreldrunum fyri á henda hátt at tálma nýtsluni, hon heldur ikki, sigur Helena Bjellvåg frá fyribyrgingini hjá Bláa Krossi. Tað vísir seg nemliga, at tey børn, sum fáa rúsdrekka frá foreldrum, samstundis fáa fatanina av, at foreldrini góðtaka, at tey drekka, og fleiri teirra enda við at drekka meira enn tey, sum ikki fáa loyvi heiman.

Jákup og Helena eru samd um, at tað snýr seg um upplýsing, um mann vil hava, at børn og ung ikki drekka. Eisini er týdningarmikið, at vit tosa um hetta allastaðni. Bæði í heiminum, í skúlanum, í grannalagnum og í ítróttafeløgunum til dømis. Og so ikki minst, at vit eru góðar fyrimyndir og ikki drekka ótálmað, tá vit eru saman við børnum og ungum.