Russar kanna 10 virki í Føroyum

Russiskir veterinermyndugleikar eru í hesum døgum í Føroyum og kanna 10 føroysk virki, sum vilja sleppa at útflyta fisk og fiskaúrdrátt til Russlands, Hvítarusslands og Kazakstan.

Russisku myndugleikarnir hava góðkent umleið 30 føroyskar fyritøkur, men nú ES-lond hava stongt sínar havnir fyri føroyskum skipum, eru fleiri føroyskir útflytarar, sum leita sær nýggjar marknaðir eystanfyri.

Eru alla vikuna

Sambært Heilsufrøðiligu starvsstovuni eru russisku eftirlitsfólkini í Føroyum alla vikuna, og tíðin verður brúkt til eftirlitsvitjanir á virkjunum. Heilsufrøðiliga starvsstovan vil ikki siga, hvørji virkini eru, men talan er um verksmiðjuskip, virkir á landi og um úttflutning av bæði uppisjóvarfiski og aldum laksi.

Føroysk virki eru vanliga góðkend samsvarandi ES_matvørulóggávu. Russland hevur sína egnu veterinerlóggávu, og tí krevst serstøk góðkenning, um føroysk virki ætla sær at útflyta til stóru londini fyri eystan. Russland, Hvítarussland og Kazakstan hava undirskrivað eina tollsamgongu. Verða føroysk virki góðkend av russum,  kunnu tey eisini frítt útflyta til Hvítarusslands og Kazakstan.

Russar strangir

Russisku eftirlitsmyndugleikarnir eru tiltiknir strangir, og Heilsufrøðiliga starvsstovan brúkar nógva orku til regluligu russisku vitjanirnar. Tí onkuntíð gongur ikki so væl. Eftir eina eftirlitsvitjan í 2008 settu russar bann fyri øllum innflutningi av føroyskum fiski og fiskaúrdrátti.