Ókeypis filmsskúli í eitt ár

Í august byrjar ein nýggjur filmsskúli í Føroyum. Skúlagongdin er eitt ár - og alt er ókeypis.

Skúlin eitur Flogfisk, og endamálið er at hjálpa ungum filmsáhugaðum at gera sínar egnu filmar. 

Tað eru Anton Petersen og Gorm Just, sum standa fyri skúlanum, ið hevur íblástur frá Super 8 og Super 16 í Danmark.

Í Ostahúsinum 

Undirvíst verður í leikstjórn, klipping, upptøku, leikriti, ljóði og framleiðslu. Haraftrat kanst tú læra um "casting", sum er at finna røttu leikararnar til tín film. 

Undirvísingin verður í Ostahúsinum, har Klippfisk hevur høli. Har er biografur, klippiútgerð, professionel kamera og ljósútgerð. Við øðrum orðum, so fært tú allan pakkan.

Fríggjadagin 21. juni kl 16:00 verður opið hús í Ostahúsinum, har kunnað verður um skúlan.