Holland fingið nýggja stjórn

Holland hevur umsíðir fingið nýggja stjórn.

Sjey mánaðir gingu frá tjóðartingsvalinum, til nýggja høgravenda stjórnin var tikin í eið í dag, skrivar Reuters.

Frælsisflokkurin við Geert Wilders á odda vann stórsigur á tjóðartingsvalinum, men hann er ikki ráðharri. Flokkurin er kortini væl umboðaður í nýggju stjórnini.

Eftir stjórnartingingar í fleiri mánaðir noyddist Geert Wilders at ásanna, meiriluti fekst ikki fyri, at hann skuldi vera forsætisráðharri.

Hollendsk stjórn

Dick Shoof, forsætisráðharri, og Willem Alexander kongur, tá nýggja stjórnin var tikin í eið í dag. (Mynd: AFP/Ritzau Scanpix)

Forsætisráðharrin hoyrir ikki til nakran flokk

Fýra flokkar á høgraveingi í hollendskum politikki mynda nýggju stjórnina. Teir eru m.a. Frælsisflokkurin og Fólkaflokkurin fyri frælsi og fólkaræði.

Forsætisráðharri er Dick Shoof, sum ikki hoyrir til nakran flokk. Hann er fyrrverandi stjóri í hollendsku fregnartænastuni og aðalskrivari í løgmála- og trygdarmálaráðnum. 

Síðani tjóðartingsvalið hevur Mark Rutte verið virkandi forsætisráðharri í Hollandi.

Í næstum tekur hann við starvinum sum Nato-aðalskrivari eftir Jens Stoltenberg.