100 ferðir Jannie og Jarnbardur

Tá tosað verður um føroyskar kappróðrarpersónligheitir slepst illa uttan um Jannie Dam Jacobsen.

Garvaða róðurskvinnan á seksmannafarinum Jarnbardi hevur róð kapp síðan 1996, og á fjarðastavnu kundi hon vinna FM-róður nummar 100 í bláa bátinum hjá Knørri.

 - Tað ætli eg mær hundrað prosent sikkurt, segði Jannie Dam Jacobsen undan róðrinum í Vestmanna.

SÍ EISINI: Vangamynd av Jannie Dam Jacobsen frá 2018

Vunnu sum vanligt

Eingin var bilsin av, at tað eydnaðist Jannie Dam Jacobsen og bátsfeløgunum. Eins og undanfarnu árini, er Jarnbardur nógv bestur hjá seksmannaførunum, og róðrarkvinnan reistist og fegnaðist um sigur nummar 100 saman við 'sínum' Jarnbardi. 

 - Hetta er ein serligur dagur. Serliga, tí tað er Jarnbardur. Eg havi vunnið 100 gull, men nú vann eg 100 gull á Jarnbardi. Eg havi róð 127 róðrar og havi vunnið 100. Tað er nokkso gott, segði ein fegin róðurskvinna.