Ferðsluóhapp í rundkoyring - bilurin vrak

Ov nógv ferð var helst orsøkin til eitt ferðsluóhapp í rundkoyringini vestan fyri Norðskálabergholið í nátt.

- Eingin illgruni er um rúsdrekka ella rúsevni, sigur politiið.

Fráboðanin um óhappið kom klokkan nítjan minuttir yvir tvey í nátt.

Bilurin vrak
Tvey ung fólk vóru í bilinum, sum kom úr bergholinum. Bilurin gjørdist vrak.

Fólkini vóru flutt á Landssjúkrahúsið til kanningar.

Eingin ábending var um stóran fólkaskaða, men ungu fólkini gramdu seg um pínu her og har.

Bilurin fór í helluna við rundkoyringina og endaði okkurt um hundrað metrar inni á vegnum til Eiðis.