Næstan onnurhvør kvinna í aldrinum 20 til 40 forvinnur meira enn 30.000 krónur um mánaðin, sum er hámarkið fyri barsilsgjaldið. Ein av hesum kvinnunum er Kristina Háberg. Hon tekur nú blaðið frá munninum, og sigur sína hugsan um hetta. 

Fíggjarligur smeitur fylgir við

- Seinastu fýra árini havi eg verið í barnsburðarfarloyvi tvær ferðir. Við øllum tí gleðiliga, sum kemur við børnunum, fylgir tó ein fíggjarligur smeitur.  Ein part av tíðini heima saman við nýføddu børnunum fekk eg løn frá arbeiðsgevaranum hjá mær. Men til samans hesi seinastu árini havi eg í umleið átta til níggju mánaðir fingið 25.000 útgoldið úr barsilsskipanini. Altso so nógv, sum eg kundi fáa við gamla hámarkinum. Hesar mánaðirnir havi eg, umframt pensjón, mist millum 100 til150.000 krónur í løn. 

Hetta snýr seg ikki um meg

- Eg haldi, at tað er tiltrongt, at tað verður tosað meira um fíggjarlig viðurskifti í sambandi við barnsburðarfarloyvi. Og eitt, sum eg vil leggja dent á er, at hetta snýr seg ikki um meg og mína løn. Hetta snýr seg um øll, bæði menn og kvinnur, sum fara niður í løn, tá tey fara heim at taka sær av einum nýføddum barni. Tað haldi eg ikki er í lagi. 

Barsilsskipanin má fylgja tíðini

- Eg eigi trý børn, og fyrsta barnið fekk eg, tá eg var 25 ára gomul. Næsta og triðja barnið fekk eg, tá eg var 36 og 39 ár gomul. Tað gingu sostatt góð 10 ár frá tí at eg var í barnsburðarfarloyvi fyrstu ferð til aðru ferð. Ta tíðina havi eg nomið mær útbúgving, fingið gongd á mína starvsleið, havi verið á arbeiðsmarknaðinum í nógv ár, og keypt mær eini hús.  

Barsilsskipanin fylgir ikki tíðini, og tað svíða foreldrini fyri

Kristina Háberg

Ótíðarhóskandi hækking

- Tað merkir, at mín fíggjarstøða er rættiliga nógv broytt hesi árini. Men barsilsskipanin er ikki nógv broytt, og er tað rætt, havi eg hug at spyrja? Tí samfelagið broytist so skjótt. Fólk eru nú eitt sindur eldri, tá tey fáa børn. Kvinnur útbúgva seg í størri mun og tjena allarhelst meira. Tí er barsilsskipanin og nýggjasta hækkingin ótíðarhóskandi.

Fleiri orsøkir til at hámarkið átti at ligið hægri

- Ein tann størsta atvoldin til strongd í familjum er ein sperd fíggjarlig støða, og tað er tann týdningarmesta orsøkin til at eg haldi, at hámarkið átti at ligið hægri. Eitt annað er, at eitt rímiligt hámark kanska hevði eggjað familjum til at fingið fleiri børn. Í løtuni fellir burðartalið, og hóast vit ikki vita hví, so er tað nærliggjandi at hugsa, at ein partur av orsøkini til tað, er tað fíggjarliga. 

Vit eiga ikki at undirmeta týdningin av, hvat pengar hava at siga fyri eina familju. 

Kristina Háberg

Vit mugu tosa um hetta

- Eg hugsi, at ein orsøk til at barsilsgjaldið ikki hevur fylgt tíðini kanska er, at vit tosa ov lítið um hetta. Tíðin í barnsburðarfarloyvi er lutfalsliga stutt, og tá hon er farin, so fara vit víðari og hugsa gott er. Men tað slepst ikki undan, at vit hava mist løn í hesum tíðarskeiðinum, og at tað er júst í hesum tíðarskeiðinum, at lívslangi fíggjarligi munurin millum kvinnur og menn byrjar. Vit eiga at tosa meira um hetta og ikki undirmeta týdningin av, hvat pengar hava at siga fyri eina familju. 

Enn er nógv at stríðast fyri

- Tað er gleðiligt, at hámarkið júst er hækkað, men tað er ikki nokk. Í dag hava vit fleiri kvinnuligar politikarar enn nakrantíð. Hóast eg haldi, at mannligir politikarar hava júst somu ábyrgd hesum viðvíkjandi, so hevði eg ynskt, at fleiri av kvinnuligu politikarunum settu sjóneykuna á barsilsskipanina. Saman hava vit kvinnur stríðst fyri so mongum saman við góðum úrslitum. Men vit hava framvegis stríðið fyri, at tað ikki skal kosta okkum at fáa børn, til góða.