Japanska stjórnin sjósetur dating-app fyri at steðga fólkaminking

Fólkatalið í Japan hevur verið minkandi í fleiri ár og í ár er onki undantak. 

Farnu 15 árini eru fleiri japanarar jarðaðir enn føddir. Og í ár setur árliga minkingin í fólkatalinum met. 

Tað vísa nýggj tøl frá japansku myndugleikunum.

1. januar í ár var fólkatalið í Japan knappar 125 milliónir. Tað er knøpp hálv millión minni samanborðið við 2023.

Føðitíttleikin er á 1,3, sum er langt frá 2,1, sum føðitíttleikin skal vera, um fólkatalið skal vera støðugt.

Japan, Japanarar

Mett sum kreppustøða

Minkandi fólkatalið verður nú mett sum ein kreppustøða í landinum, sigur Philip Róin, sum er tíðindafólk hjá Danska Kringvarpinum í Asia. 

Ein av mettu orsøkunum til, at japanarar fáa alsamt færri børn, er sambært Philip Róin, at kvinnurnar seinastu árini í størri og størri mun eru komnar inn á arbeiðsmarknaðin. Arbeiðsvikan í Japan er 60 tímar og hetta sampakkar ikki væl við at fáa børn.

Japansku myndugleikarnir seta nú eina røð av tiltøkum í verk, sum skulu økja um burðartalið, millum annað spurnakanningar og eina nýggja sokallaða "dating app".

Samstundis hevur japanska fyritøkan Oju Holdings boðað frá, at tey halda uppat við at framleiða barnablæur, eftirsum at sølan er minkað so nógv. Í staðin fara tey at økja um teirra úrval av blæum til vaksin og eldri fólk. Tað sigur fyritøkan, sambært BBC.