Farið úr Libanon sum skjótast

Danskir ríkisborgarar eiga at fara úr Libanon sum skjótast, meðan tað enn ber til at sleppa haðani.

Tey eru boðini frá danska Uttanríkisráðnum í dag.

Í gjár doyðu 12 fólk, tá lopið var á Golanheyggjarnar.

Ísrael gevur Hizbollah skyldina og hevur lopið á Libanon.

Uttanríkisráðið sigur, at vandin fyri kríggi er sera stórur.

Støðan kann versna skjótt

Støðan kann versna nógv rættiliga skjótt.

Mælt verður fólki til at fara úr Libanon sum skjótast, meðan flogførini enn flúgva.

Og mælt verður sjálvandi eisini til ikki at fara til Libanon.

Gjørt verður vart við, at møguleikarnir hjá donsku stjórnini at hjálpa donskum ríkisborgarum í Libanon eru sera avmarkaðir.

Als eingin trygd er fyri, at stjórnin kann hjálpa fólki at sleppa úr Libanon.