Ayatollah Ali Khamenei: Teheran hevur skyldu til at hevna drápið á Haniyeh

Atsóknin var framd klokkan tvey í nátt, lokala tíð, bara fáar tímar eftir at Ismail Haniyea hevði verið við til hátíðarhaldið, tá nýggi iranski forsetin Masoud Pe'zesh'kian var tikin í eið. 

Pe'zesh'kian fordømir atsóknina og sigur við almennu miðlarnar í landinum, at Iran fer at fáa hesar yvirgangsmenn at angra teirra feigu drápsatsókn móti Haniyeh.

Eisini andaligi leiðarin í Iran, Ayatollah Ali Khamenei, fordømir atsóknina.

Ayatollah Ali Khamenei sigur, at Ísrael hevur skapt sær sjálvum eina harða revsing. Eisini sigur Khamenei, sambært Reuters, at Teheran hevur skyldu til at hevna drápið á Haniyeh. 

​Ismail Haniyeh, Ayatollah Ali Khamenei

Katar fordømir eisini atsóknina

62 ára gamli Ismail Haniyeh var ovasti í politbyronum hjá Hamas. Hann hevur síðstu árini búð í Katar, og síðani 2018 hevur hann staðið á listanum hjá USA við yvirgangsfólki.

Uttanríkismálaráðið í Katar fordømir atsóknina móti Ismail Haniyeh. Talan er um eina vandamikla víðkan av stríðnum, ljóða boðini úr Katar.

Eisini Russland og Turkaland fordøma atsóknina.

Ismail Haniyeh

Ein politisk atsókn

Russiska uttanríkismálaráðið skrivar, at drápið á Ismail Haniyeh er ein politisk atsókn, sum ikki kann góðtakast. Og fyrsta reaktiónin frá Turkalandi er, at landið fordømir atsóknina og sigur í sama viðfangi, at ísraelska stjórnin hjá Netanyahu hevur ongan vilja at skapa frið í økinum. 

Eingin hevur tikið ábyrgdina av drápinum, men hildið verður, at Ísrael stendur aftan fyri álopið. USA hevur boðað frá, at tey fara at verja Ísrael, um landið verður álopið.

Í gjárkvøldið boðaði Ísrael eisini frá, at ein av ovastu Hizbollah-leiðarunum, Fouad Shukur, var dripin í einum álopi í Beirut.