Nakrir skaðar í vindinum

Eitt fólk misti bilhurðina í nógva vindinum, so hon kom í ein annan bil. Ein trampolin varð funnin úti á vegnum og nakað av leysum byggitilfari rakst í vindinum.

Í tveimum førum noyddist løgreglan manuelt at lata elektronsikar hurðar aftur, sum møguliga orsakað av streymsliti, vóru farnar upp og stóðu opnar.

Ein bileigari eftirlýsti fríggjadagin bilin hjá sær. Bilurin var funnin aftur leygardagin, og tá sat ein maður í honum. Løgreglan metir, at hann hevur stolið bilin, men maðurin noktar seg sekan.

Nógv áarføri hevur verið, og í Sandavági og í Kollafjarðardali fór ein á upp um áarbakkan.

Løgreglan fer í dag at kanna eitt harðskapsmál frá í nátt. Eingi vitni eru avhoyrd enn. - Neyðugt verður at samskifta á útlendskum máli, sigur vaktleiðarin.

Steðgaðu 50 bilum
Um 50 bilar vóru steðgaðir í nátt í Vágum. Dansur var í oynni. Men einki mál var skrivað. - Har var mest talan um foreldur, sum komu eftir børnum sínum, sigur vaktleiðarin.

Nógv fólk var í býnum í Havn í nátt, og tað var løgreglan eisini.

Vaktleiðarin sigur, at fleiri smámál vóru, sum løgreglan steðgaði. Hevði hon ikki gjørt tað, høvdu tey helst endað við broti á skilhaldsreglurnar ella við harðskapi.

Løgreglan steðgaði fleiri bilum í Havn, men har var einki mál skrivað, og løgreglan var eisini á Sandi fyri at steðgða bilum, men har møtti hon ongum bili.