Ovasti Hezbollah-leiðarin er dripin

Ísrael boðaði fyrrapartin í dag frá, at ovasti Hezbollah-leiðarin Hassan Nasrallah er dripin í einum álopi í gjár.

Og stutt eftir døgurða leygardagin okkara tíð váttaði Hezbollah eisini hesi tíðindini.

Hassan Nasrallah hevur verið aðalskrivari hjá Hezbollah í Libanon seinastu 30 árini. Sambært ísraelska herinum doyði hann í einum álopi hjá ísraelskum jagaraflogførum á Hezbollah-høvuðsborgina í Beirut í gjár.

Puk Damsgård, sum er royndur korrespondentur hjá danska kringvarpinum í Miðeystri, sigur, at tíðindini um, at Hassan Nasrallah er deyður, eru at meta sum ein jarðskjálvti. Hon sigur við DR, at hann er ein tættur sameindur hjá Iran og hevur verið leiðari hjá Hezbollah síðan 1992, tá Ísrael drap undanfarna Hezbollah-leiðaran.

Puk Damsgård sigur eisini, at talan er um týdningarmesta persónin, sum Ísrael hevur dripið í hesum stríðnum.

Tey meir enn 30 árini, Hassan Nasrallah hevur verið leiðari av Hezbollah, hevur hann megnað at broytt felagsskapin frá at vera ein mótstøðurørsla til at verða ein statur í statinum. Hezbollah er blivið ein politiskur flokkur og ikki bert ein mótstøðurørsla.

Iranski andaligi leiðarin Ayatollah Ali Khamenei heitti í gjár á muslimar um at standa undir liðini á fólkinum í Libanon og Hezbollah og hjálpa teimum at bjóða ónda stýrinum av - í hesum føri Ísrael. "Við Guds náði fer Libanon at fáa innræsna og ónda fíggindan at iðra seg um sínar gerðir", segði Ali Khamenei.